Transport universitetida rahbar va yoshlar uchrashuvi tashkil etildi

Bugun Transport universitetida tahsil olayotgan bitiruvchi kurs talabalari inspeksiya boshlig‘i o‘rinbosari A’zam Abduraxmanov bilan uchrashib o‘zlarini qiziqtirgan ko‘plab savollariga javob olishdi. Dastlab inspeksiya faoliyati, tizimi haqida axborot berildi. Temir yo‘llarda harakat xavfsizligini ta’minlash sohadagi dolzarb vazifalaridan ekanligi va mazkur jarayonni nazorati qay tartibda amalga oshirilishi, Qonun hujjatlari asosida tushuntirib  berildi. Shuningdek, inspeksiyada ishga qabul qilishdagi talablar haqida batafsil to‘xtalib o‘tildi.

Inspeksiyada “Yosh mutaxassislarni tanlash dasturi” qabul qilinganligi va mazkur Dastur haqida ham talabalarga ma’lumot berildi. Ayni kunda oliy ta’lim muassasalari bakalavriatida 4-bosqichda tahsil olayotgan talabalar o‘rtasida “O‘ztemiryo‘lnazorat” inspeksiyasida stajirovka o‘tash yuzasidan e’lon qilingan tanlov yoshlarni katta qiziqishiga sabab bo‘ldi. Ular tanlov shartlari, stajirovka o‘tash va u bilan bog‘liq bo‘lgan jarayonlar haqida muhim ma’lumotlarga ega bo‘lishdi.

Inspeksiya yoshlar yetakchisi Bexruz Qaxramonov bundan ikki yil oldin bitiruvchi kurs talabasi bo‘lib, inspeksiyada kelib ish o‘rganib, malaka oshirgan davrlarini esladi. “O‘ztemiryo‘lnazorat” inspeksiyasidagi ijobiy ichki muhit, yoshlarga yaratib berilgan sharoit, bildirilgan ishonch, kadrlar tanlashdagi adolatli va shaffof tizim natijasi o‘laroq, yosh bo‘lishiga qaramay Bosh buxgalter lavozimida faoliyat yuritayotganini faxr bilan tilga oldi. Umuman inspeksiyada ish o‘rganish, yetuk kadr sifatida shakllanish, ustoz-shogird an’analari to‘g‘ri yo‘lga qo‘yilganini ta’kidlab o‘tdi.

Mutasaddilar tadbir yakunida inspeksiyada stajirovka o‘tash istagidagi talabalar uchun hujjatlarni qabul qilish telegram boti, arizalarni to‘ldirish tartibini tushuntirib, yoshlarga omad tilashdi.

“O‘ztemiryo‘lnazorat” inspeksiyasi
Axborot xizmati