“Yoshlar kuni” munosabati bilan musobaqa tashkil etildi

Mamlakatimizda mana 5 yildan buyon 30-iyun sanasi yoshlarning chinakam bayramiga aylanib, “Yoshlar kuni” sifatida keng nishonlanmoqda. Kelajagimiz egalari bo‘lmish yoshlarning har tomonlama rivojlanib, yetuk shaxs bo‘lib yetishishlari uchun barcha sharoitlar yaratilib, ularga davlat tomonidan g‘amxo‘rlik ko‘rsatilmoqda. “O‘ztemiryo‘lnazorat” inspeksiyasi ham o‘z faoliyati davomida yoshlar bilan ishlashga, ularni har tomonlama qo‘llab-quvvatlashga alohida e’tibor qaratib keladi. Yosh xodimlarning g‘oya va takliflari har doim xursandchilik bilan qabul qilinib, ro‘yobga chiqarish choralari ko‘riladi. Ularning bo‘sh vaqtlarini mazmunli o‘tkazish, sport bilan muntazam shug‘ullanishlari uchun ham imkoniyatlar yaratilgan.

Yoshlar kuni munosabati bilan inspeksiyadagi yosh xodimlar shaxmat doskasi atrofida jam bo‘lishdi. Puxta tayyorgarlikka ega iqtidor egalari shaxmat va shashkada imkoniyatlarini sinovdan o‘tkazishdi. Hamkasblarning musobaqa doirasidagi harakatlari murosasiz kechganini ta’kidlab o‘tish lozim. So‘nggi soniyaga qadar qiziqarli kechgan bahslar yakunida g‘oliblikni qo‘lga kiritgan xodimlar kasaba uyushmasi qo‘mitasi tomonidan esdalik sovg‘alar bilan taqdirlandi.

“O‘ztemiryo‘lnazorat” inspeksiyasi
Axborot xizmati