Alisher Navoiy tavallud ayyomi keng nishonlandi

9-fevral nafaqat mamlakatimizda balki, dunyoning aksariyat davlatlarida keng nishonlanadigan sanalardan hisoblanadi. Bugungi kunda g‘azal mulkining sultoni, mutafakkir shoir Alisher Navoiy merosi va g‘oyalarini chuqur o‘rganish va yoshlarga yetkazish har qachongidan ham muhim ahamiyat kasb etmoqda. Aynan shu maqsadlarni o‘zida jam etgan turli madaniy-maʼrifiy kechalar tashkil etildi. Jumladan, “O‘ztemiryo‘lnazorat” inspeksiyasi markaziy apparatida o‘tkazilgan tadbirda ulug‘ bobokalonimiz hayot yo‘li, asarlari, tarixda tutgan o‘rni, davlat arbobi sifatida amalga oshirgan ulkan ezgu ishlari to‘g‘risida to‘xtalib o‘tildi.

Alisher Navoiy hayot yo‘li aks etgan qisqa metrajli hujjatli film namoyish etildi, g‘azallari tinglandi. Shuningdek, «Adiblar xiyoboni»da ulug‘ mutafakkir bobomiz Alisher Navoiy tavalludining 581 yilligiga bag‘ishlangan tantanali tadbir bo‘lib o‘tdi. Unda mamlakatimiz davlat va jamoat tashkilotlari xodimlari, ziyolilar, adabiyotshunos olimlar bilan birga Transport vazirligi va tizim tashkilotlari vakillari ishtirok etishdi. Anʼanaviy tadbir ishtirokchilari ulug‘ bobokalonimiz qoldirgan ulkan meros haqida fikr bildirib, g‘azallari bilan kuylanuvchi qo‘shiqlarni ijro etishdi.  Vazirlik va idoralar tomonidan Alisher Navoiy haykali poyiga gullar qo‘yildi.

 “O‘ztemiryo‘lnazorat” inspeksiyasi
Axborot xizmati