Ustoz temiryo‘lchilar taqdirlandi

Hayotda shunday kasb egalari borki, ularning mehnatidan barcha birdek bahramand va umrbod minnatdor bo‘ladi. Ustozlar haqida har qancha gapirmaylik, har qancha ular shaʼniga iliq fikrlar bildirmaylik baribir oz bo‘lib ko‘rinaveradi. Chunki har birimizning hayotda o‘z o‘rnimizni topishimizda, maʼlum kasb egasi bo‘lishimizda murabbiylarning mehnati beqiyos.

1-oktyabr – O‘qituvchi va murabbiylar kuni munosabati bilan “O‘ztemiryo‘lnazorat” inspeksiyasida bir guruh ustoz temiryo‘lchilar inspeksiya rahbariyati va kasaba uyushmasi qo‘mitasi tomonidan eʼtirof etilib, munosib taqdirlanishdi. Uzoq yillar davomida temir yo‘l va temir yo‘llarda harakat xavfsizligini taʼminlanishini nazorat qilish borasida salmoqli mehnat qilgan, qator yoshlarga o‘z bilim va tajribasi bilan ustozlik qilgan hamkasblarimiz sharafiga ezgu tilaklar bildirildi. Ularning inspeksiya ravnaqidagi o‘rni, ayniqsa shogirdlari kamol topishi yo‘lidagi mehnatlari alohida eʼtirof etildi. Katta avlod vakillari o‘z o‘rnida eʼtirofdan mamnunliklarini yashirmay, yoshlarga yaratib berilgan sharoitlardan oqilona foydalanish va yurt koriga dastyor bo‘lish lozimligini taʼkidlab o‘tishdi.

“O‘ztemiryo‘lnazorat” inspeksiyasi
Axborot xizmati