“Ўзтемирйўлназорат” жамоаси ғолиб!

Ўзбекистон темирйўлчилари ва транспорт қурувчилари  касаба уюшмаси Республика Кенгаши ташаббуси билан “Локомотив” марказий жисмоний спорт клубида тармоқ касаба уюшмаси тасарруфидаги корхоналарда меҳнат қилаётган аёллар ўртасида “Халқаро хотин-қизлар куни”га бағишлаб спартакиада баҳслари ўтказилди. Мусобақада 100 нафарга яқин иштирокчилар   спортнинг  стол тенниси, 100 метрга югуриш, шашка, баскетбол тўпини шитга тушириш ҳамда арқон тортиш турлари бўйича ўзаро беллашишди. Ходимлар ўртасида соғлом турмуш тарзини шакллантириш, оммавий спортни кенг тарғиб этиш ва уларнинг бўш вақтларини мазмунли ўтказиш мақсадида ташкил этилган турнир қизғин ва муросасиз курашларга бой тарзда ўтди. Темирйўлчилар ҳар бир шартда бор имкониятларини ишга солишди.

       Якуний натижаларга кўра, стол тенниси бўйича 1-ўринни “Тошкент механика заводи” акциядорлик жамияти ходими С.Федина эгаллаган бўлса, 100 метрга югуриш баҳсларида “Ўзбекистон темир йўллари” акциядорлик жамияти ходими Н. Беренгер маррага биринчи бўлиб етиб келди. Баскетбол тўпини шитга туширишда “Тошкент йўловчи вагонларини қуриш ва таъмирлаш заводи” акциядорлик жамияти ходими Д. Ирматова энг яхши натижани қайд этди. Шашка бўйича ўтказилган мусобақада  Марказий темир йўл касалхонаси ходими У.Дрозд энг кўп очко жамғаришга муваффақ бўлди.

        Энг муросасиз беллашувлар эса жамоавий арқон тортиш бўйича кечди десак муболаға бўлмайди. Спартакиадага пухта ҳозирлик кўрган Ўзбекистон Республикаси Транспорт вазирлиги ҳузуридаги “Ўзтемирйўлназорат” инспекцияси жамоаси вакиллари ўз маҳоратларини тўла намойиш этиб, йиғилганлар олқишига сазовор бўлишди. Ю.Семёнова, Ю.Кубрина, С.Нишоналиева ва Ю.Иргашевалардан ташкил топган жамоамиз бешта учрашувнинг барчасида рақибларини мағлуб этиб, ҳақли равишда ғолибликни қўлга киритишди.

Мусобақадан ҳар томонлама кўнглим тўлди, - дейди “Ўзтемирйўлназорат” инспекцияси жамоаси аъзоси Юля Семёнова.
Энг аввало эски танишларни, ҳамкасбларимни кўрдим. Ҳар бир баҳсда олам-олам қувонч ва ҳис ҳаяжонни туйдим.
Инспекциямизда касаба уюшма ташаббуси билан спортнинг сузиш, стол тенниси, шашка каби турларида қатнашиб турамиз.
Тўплаган малакамиз бугун иш бериб, арқон тортиш баҳсларида ғолибликни қўлга киритдик. Бундан жуда мамнунмиз.
       
Мусобақа якунида барча иштирокчилар ташкилотчилар томонидан муносиб  тақдирландилар.

“Ўзтемирйўлназорат” инспекцияси

Ахборот хизмати