«O‘ztemiryo‘lnazorat» inspeksiyasi «Book challenge» aksiyasida faol ishtirok etmoqda

             “O‘ztemiryo‘lnazorat” inspeksiyasi rahbar va xodimlari o‘zlari tahsil olgan maktablarga turli mavzudagi 400 donadan ortiq kitoblarni sovg‘a qilishdi. Inspeksiya boshlig‘i Doniyor Axmedov, boshliq o‘rinbosari A’zam Abduraxmanovlar boshlab bergan aksiyani qolgan xodimlar ham faol davom ettirishdi. Jumladan, markaziy apparat bir guruh xodimlari poytaxtimizdagi Yashnobod tumani xalq ta’limi bo‘limiga qarashli 103-son imkoniyati cheklangan bolalar uchun ixtisoslashtirilgan maktab-internatiga tashrif buyurib, bolajonlarga esdalik uchun kitoblarni sovg‘a qilishdi.

               Joriy yilning 19 - mart kuni O‘zbekiston Respublikasi Prezidenti raisligida bo‘lib o‘tgan videoselektor yig‘ilishida davlatimiz rahbari tomonidan 5 ta tashabbus ilgari surilgan edi. Unda Sh.Mirziyoyev “Barcha rahbarlar… bosh vazirdan boshlab, tumanlar rahbarlari, barcha deputatlar, kelinglar, o‘zimiz tashabbus ko‘rsataylik va o‘zimiz o‘qigan tumandagi maktablarga 10−20 tadan kitob sovg‘a qilaylik. Hamma ham kitob o‘qiyvermaydi, biroq yoshlarimizga ular kerak”, — deya ta’kidlagandi. Mazkur aksiya tezda respublika bo‘ylab keng quloch yoydi va unda barcha bo‘g‘indagi rahbarlar, deputatlar, davlat va xo‘jalik boshqaruvi organi rahbarlari ishtirok etishmoqda.

                 Inspeksiyaning filial xodimlari ham aksiyada munosib ulushlarini qo‘shishdi. Filial boshliqlari o‘zlari o‘qib, katta hayotga yo‘llanma bergan ilm dargohlarida bo`lib, shaxsiy kutubxonalaridan kitoblar sovg‘a qilishdi. Shuningdek, maktab infratuzilmasini yaxshilash maqsadida ma’lum miqdorda homiylik yordami ko‘rsatildi.

“O‘ztemiryo‘lnazorat” inspeksiyasi
Axborot xizmati