Sirdaryoda tadbirkorlar uchun seminar o‘tkazildi
O`zbekiston Respublikasi Prezidentining 2019 - yil 9 - yanvardagi “Jamiyatda huquqiy ong va huquqiy madaniyatni yuksaltirish tizimini tubdan takomillashtirish to‘g‘risida”gi Farmoni davlat organlari va tashkilotlari oldida aholining huquqiy madaniyatini yanada yuksaltirish borasida bir qancha vazifalarni qo‘ydi. Jumladan Transport vazirligi huzuridagi Temir yo‘llarda yuk va yo‘lovchilar tashish xavfsizligini nazorat qilish inspeksiyasi xodimlari ham ushbu yo‘nalishda keng qamrovli ishlarni amalga oshirib kelishmoqda. Respublikamizning turli viloyatlarida shaxobcha temir yo‘liga ega bo‘lgan tadbirkorlik sub’ektlari va temir yo‘l transporti vakillari uchun seminarlar tashkil etilyapti. Sirdaryo viloyatida o‘tkazilgan galdagi tadbir “Guliston” stansiyasida bo‘lib o‘tdi. Unda dastlab Transport va temir yo‘l sohasidagi so‘nggi yangiliklar haqida batafsil ma’lumot berildi, qarorlar mohiyati yig‘ilganlarga tushuntirildi.
Temir yo‘llarda harakat xavfsizligini ta’minlashga oid amalga oshirilayotgan ishlar va galdagi vazifalar to‘g‘risida to‘xtalib o‘tildi. Temir yo`llarda sodir bo`layotgan ko‘ngilsizliklarning asosiy sababi tahlil qilindi va aksariyat hollarda fuqarolarimizning befarqligi, e’tiborsizligi ayanchli oqibatlarga olib kelayotganligi ma’lum bo`ldi. Shu bois temir yo‘l kesishmalarida, temir yo‘l atrofida hushyorlikni oshirish lozimligi ta’kidlandi.
Tadbirkorlik sub’ektlari faoliyatini yanada rivojlantirishda korrupsiyaga qarshi birgalikda kurashish mazkur illatni oldini olish va bartaraf etishda qo‘l kelishi ma’lum qilindi.
Shundan so‘ng barcha ishtirokchilar va OAV xodimlari o‘zlarini qiziqtirgan ko‘plab savollarga javob olishdi. Tadbir uning barcha qatnashchilari uchun foydali, quvnoq va bahs munozaralarga boy tarzda nihoyasiga yetdi.
“O‘ztemiryo‘lnazorat” inspeksiyasi
Axborot xizmati
