Temir yo‘l kesishmalarida videokuzatuv!
“O‘ztemiryo‘lnazorat” inspeksiyasi Qashqadaryo filiali xodimlari tomonidan temir yo‘llarda harakat xavfsizligini ta’minlanishini nazorat qilish va ehtimoliy xavflarni oldini olish maqsadida profilaktik tadbirlar reja asosida davom ettirilmoqda. Jumladan, filial hududida joylashgan stansiyalar va o‘zining shaxobcha temir yo‘liga ega bo‘lgan korxonalarda joriy yilning ortda qolgan 9 oyi mobaynida jami 137 ta seminarlar o‘tkazildi va unda 1500 nafardan ziyod xodimlar ishtirok etishdi. Mazkur tadbirlarning 17 tasi o‘zining shaxobcha temir yo‘liga ega bo‘lgan tadbirkorlik sub’ektlarida bo‘lib o‘tdi.
Qarshi-Kitob va Qarshi-Talimarjon yo‘nalishidagi temir yo‘l va avtomobil yo‘llari kesishadigan, qo‘riqlanadigan kesishmalarga zamonaviy videokuzatuv uskunalari o‘rnatilgan. Ushbu videokuzatuv tizimida tasvirga tushirilgan avtotransport haydovchilari tomonidan sodir etilayotgan qoidabuzarliklar belgilangan tartibda ro‘yxatga olinib, tegishli chora ko‘rilishi uchun viloyat IIB YHX boshqarmasiga yuborilmoqda. Kesishmalarda kechayu-kunduz navbatchilik ham yo‘lga qo‘yilgan.
Xavfsizlik temir yo‘l transporti faoliyati uchun eng muhim omil hisoblanadi. Shu bois bu boradagi ishlarga keng qamrovda ahamiyat qaratiladi. Xususan, joriy yilning sentyabr oyida “O‘zbekiston temir yo‘llari” aksiyadorlik jamiyati Harbiylashtirilgan qo‘riqlash xizmati boshqarmasi bilan birgalikda 11 ta o‘quv muassasalarida tehsil oladigan va 14 ta mahallalarda istiqomat qiladigan aholi o‘rtasida temir yo‘l atrofida chorva mollari qarovsiz holda qoldirmaslik, yosh bolalar tomonidan poyezdlar g‘ildiragi ostiga tosh qo`yilishi holatlariga yo‘l qo‘ymaslik maqsadida tushuntirish ishlari o‘tkazildi. Qoidabuzarlikka yo‘l qo‘yganlarga ko‘riladigan jazo choralari ham eslatib o‘tildi.
Olim Qurbonazarov
“O‘ztemiryo‘lnazorat” inspeksiyasi
Qashqadaryo filiali boshlig‘i
