Saylov qonunchiligida qanday o‘zgarishlar bor?
O‘zbekiston Respublikasi Transport vazirligi huzuridagi “O‘ztemiryo‘lnazorat” inspeksiyasida milliy saylov qonunchiligidagi yangiliklar va ularning mohiyatiga bag‘ishlangan huquqiy targ‘ibot tadbiri o‘tkazildi. Unda inspeksiya markaziy apparati, Toshkent filiali xodimlari, Toshkent shahar Adliya boshqarmasi mas’ul xodimi Ilhom Yusupov va OAV vakillari ishtirok etishdi.
Ma’lumki Markaziy saylov komissiyasi tomonidan 2019 - yil 11 - oktyabr kuni “Saylov qonunchiligi targ‘iboti oyligi”ni tashkil etish va o‘tkazish to‘g‘risida qaror qabul qilingan. Unga muvofiq, joriy yilning 20 oktyabridan 20 noyabriga qadar mamlakatimizda “Saylov qonunchiligi targ‘iboti oyligi”ni o‘tkazish belgilangan.
“Saylov qonunchiligi targ‘iboti oyligi”ni “O‘ztemiryo‘lnazorat” inspeksiyasida ham yuqori darajada o‘tkazish maqsadida tashkil etilgan tadbirda inspeksiya xodimlari huquqiy bilimlarini yanada mustahkamlab olishga muvaffaq bo‘lishdi. Seminarda 2019 - yilning 25 - iyunidan amaliyotga joriy etilgan O‘zbekiston Respublikasining Saylov kodeksi mazmun mohiyati, milliy saylov qonunchiligimizdagi so‘nggi o‘zgarishlar, saylovlar orqali fuqarolarning davlat va jamiyat boshqaruvidagi bevosita ishtiroki haqida so‘z yuritildi.
Qolaversa, O‘zbekiston Respublikasi Transport vazirligi tizimida, jumladan “O‘ztemiryo‘lnazorat” inspeksiyasida 2019 - yil oktyabr oyi – Huquqiy madaniyat oyligi deb e’lon qilingani munosabati bilan xodimlarning huquqiy savodxonligini oshirish maqsadida yig‘ilganlarga qonunchilikdagi so‘nggi yangiliklar, normativ hujjatlar mazmun-mohiyati borasida batafsil tushuntirishlar berib o‘tildi.
Shuningdek, Prezidentimizning “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbirlari to‘g‘risida” Farmoni va unga muvofiq 2019-2020 yillarda korrupsiyaga qarshi kurashish davlat dasturi borasida amalga oshirilayotgan keng ko‘lamdagi ishlar, mazkur illatni oldini olishda fuqarolarning muhim o‘rni borasida to‘xtalib o‘tildi.
Bu kabi huquqiy targ‘ibot tadbirlar inspeksiyaning hududiy filiallarida davom ettiriladi.
Firdavs Xayriddinov
“O‘ztemiryo‘lnazorat” inspeksiyasi boshlig‘ining
matbuot kotibi – axborot siyosati masalalari
bo‘yicha maslahatchisi
