Navbatdagi samarali seminar…

 “O‘ztemiryo‘lnazorat” inspeksiyasi markaziy apparati va filiallar xodimlari temir yo‘llarda harakat xavfsizligini ta’minlash maqsadida tekshirishlar bilan birgalikda profilaktik tadbirlarga ham alohida e’tibor qaratishmoqda. Mazkur tadbirlarning ahamiyati shundaki, yo‘l qo‘yishi mumkin bo‘lgan noxush holatlar oldi olinadi va bu borada nimalarga e’tibor qaratish lozimligi uqtiriladi.

Joriy oy davomida inspeksiya xodimlari tomonidan shaxobcha temir yo‘liga ega bo‘lgan tadbirkorlik sub’ektlarida 370 dan ortiq seminarlar o‘tkazildi. Tashkil etilgan seminarlarda har bir xo‘jalik bo‘yicha alohida to‘xtalib o‘tilib, batafsil tushuntirishlar berildi. Jumladan, Qo‘ng‘irot vagon deposida o‘tkazilgan tadbir ham uning ishtirokchilari uchun qiziqarli va foydali bo‘ldi. Dastavval ko‘p takrorlanayotgan xatolar tahliliga e’tibor qaratildi. Xatolarga yo‘l qo‘ymaslik borasida kerakli tavsiyalar berildi. Depo faoliyatida ishchi-xizmatchilar qaysi yo‘riqnomalarga asosan ishni tashkil etishi lozimligi borasida ham tushuntirishlar berildi. 

Seminarda temir yo‘llarda harakat xavfsizligini ta’minlash borasida qilinishi lozim bo‘lgan ishlar bilan birgalikda ishtirokchilarning huquqiy ongi va huquqiy madaniyatini yanada yuksaltirish maqsadida transport sohasidagi va boshqa qonun hujjatlari mazmun mohiyati bilan ham batafsil tanishtirib o‘tildi. Mamlakatimizda va inspeksiyada korrupsiyaga qarshi kurashish va uni oldini olish maqsadida olib borilayotgan keng qamrovdagi ishlar to‘g‘risida ham to‘xtalib o‘tildi. Mazkur illatni bartaraf etishda fuqarolarning ham ishtiroki, fuqarolik pozitsiyasini namoyon etishi nihoyatda muhimligi bildirildi. Zero, korrupsiyaga qarshi keskin kurashish orqali tadbirkorlik sub’ektlari faoliyatini yanada takomillashtirishga ham erishish mumkinligi misollar yordamida tushuntirildi.

Firdavs Xayriddinov
“O‘ztemiryo‘lnazorat” inspeksiyasi
boshlig‘ining matbuot kotibi-axborot
siyosati masalalari bo‘yicha maslahatchisi