Ҳамкасбларимиз меҳнатига муносиб эътироф!
Ҳамкасбларимиз меҳнатига муносиб эътироф!
Ўзбекистон темирйўлчилари ва транспорт қурувчилари касаба уюшмаси Республика Кенгаши тасарруфидаги барча бўғинларда фаолият олиб бораётган касаба уюшма ташкилотлари масъул ходимлари ва фаолларини Янги йил байрами муносабати билан муносиб тақдирлади. Қувонарли томони мазкур тадбирда ҳамкасбимиз, “Ўздавтемирйўлназорат” инспекцияси норматив-технологик бўлими бошлиғи Фарход Йўлдошев ҳам эътироф этилганлар қаторида бўлди. Ўзининг меҳнатсеварлиги, фидойилиги, ҳаллолиги, касбга бўлган юксак садоқатини йиллар давомида амалда намоён этиб келаётган тажрибали ходим шу куни меҳнатига яраша тақдирланди.
-Мен учун якунига етаётган йил ҳар томонлама омадли, қувончли келди дейишим мумкин, - дейди Ф.Йўлдошев. Иш юзасидан қатор қарор лойиҳаларини ишлаб чиқдик ва бугунги кунда амалиётда ижросини таъминлашга эришяпмиз. Жамоада иш жипслик, ҳамжиҳатлик ўзаро ҳурмат ва соғлом рақобат асосида ташкил этиляпти. Оиламда ҳам тинч-тотувлик. Шу кеча-кундузда невараларим сони яна биттага кўпайиб, уйимиздаги кўтаринки руҳни янада ортишига сабаб бўлди. Касаба уюшмаси томонидан тақдирланганим эса омадли йилга чиройли якун ясаб берди. Бундан жуда мамнунман. Фурсатдан фойдаланиб барча жамоадошларимни, ҳамкасбларимни кириб келаётган 2019 – йил билан чин қалбдан табриклайман. Янги йилда уларга улкан муваффақиятлар тилаб қоламан.
Тақдирланганлар орасидан инспекция касаба уюшмаси раиси Фирдавс Хайриддинов ҳам ўрин олди. Ф.Хайриддинов қисқа вақт давомида ходимлар манафаати йўлида муносиб меҳнат ва дам олиш шароитини яратишга, молиявий интизомни мустаҳкамлаш, касаба уюшмалари мавқеини оширишга қўшаётган ҳиссаси, меҳнат муҳофазасини таъминлашни жамоатчилик асосида назорат қилиш борасида амалга оширган самарали фаолияти Республика Кенгаши томонидан юқори баҳога лойиқ кўрилди ва қимматбаҳо совға билан тақдирланди.
“Ўздавтемирйўлназорат” инспекцияси
Ахборот хизмати
